CARACAS, AP.- Un di e dirigentenan opositor prinsipal di Venezuela, diputado Freddy Guevara, a refugia den residensia di e embahador di Chile despues ku Tribunal Supremo di Hustisia a ordená pa kita su inmunidat parlamentario.
E Ministerio di Relashon Eksterior di Chile a bisa djasabra anochi den un komunikado ku Santiago a otorgá Guevara, promé visepresidente di Asamblea Nashonal di Venezuela, “e kalidat di wéspet den nos embahada”.
“Debí na menasanan di su seguridat i integridat personal, el a pidi protekshon na Chile”, asina kansier a afirmá refiriendo n’e legislador. Guevara a drenta den residensia di e embahador na Caracas ku su pareha, terminando ku mas di 24 ora di suspenso pa su búskeda.
Vehíkulonan di polis di inteligensia Sebin a rondoná su kas. Djabièrnè tribunal Superior di Hustisia na Venezuela a prohibí Guevara di bandoná e pais i a pidi Asamblea Konstituyente pa kanselá su inmunidat debí na un posibel detenshon i huisio despues di esaki.
E tribunal a akusá Guevara di instigá agitashon i otro delitonan pa protestanan anti gubernamental kual el a enkabesá durante vários luna e aña aki.
Guevara, visepresidente di Kongreso, tabata na vanguardia di protestanan di oposishon ku a mobilisá sentenar i míles di venezolano frustra ku e krísis polítiko i ekonómiko di su nashon.
