LOS ANGELES, MERKA, AFP.- Diferente gorila den zoológiko di San Diego na sùit di California a tèst positivo pa e Corona vírus nobo. A pone nan den karentena segun indikashon di e atministrashon di e zoológiko i gobernador di e estado na kosta wèst di Merka.
“Nos tin dos gorila di zoológiko di San Diego ku a tèst positivo pa COVID-19” i un terser ku síntoma, segun indikashon di e gobernador Gavin Newsom durante un konferensia di prensa relashoná ku e pandemia. “Nos ta den proseso di konfirmá e fuente di infekshon”, asina el a agregá.
Esaki ta e promé kaso konosí di transmishon di COVID-19 den e animalnan aki.
Estudionan a mustra ku algun di e espesienan aki por haña e vírus di COVID-19 “pero ta e promé kaso di transmishon natural entre makakunan grandi i no ta evidente si nan lo keda afektá gravemente”, segun indikashon di zoológiko.
E zoológiko di San Diego ta sera pa públiko pa motibu di e pandemia i su funshonarionan ta sospechá ku e gorilanan aki a keda infektá pa “un empleado asintomátiko”, kende sin embargo a sigui e medidanan di prekoushon rekomendá pa outoridat di salú i kende a usa un masker den serkania di e animalnan aki.
