LISBOA, PORTUGAL, AFP.- Presidente Marcelo Rebelo de Sousa a tèst positivo pa Corona vírus i a kanselá tur enkuentro públiko, segun indikashon di su ofisina djaluna, dos siman promé ku elekshon presidensial den e pais.
E presidente no tin síntoma i ta isolá den su palasio presidensial na Lisboa segun indikashon di su ofisina.
El a isolá su mes djárason, despues ku algun miembro di su atministrashon a tèst positivo, pero e presidente a tèst negativo i no a drenta den karentena pa motibu ku su kontakto ku e persona konserní tabata di “riesgo abou”.
Portugal ta pasando dor di un ‘lockdown’ mas pa motibu ku a registrá 122 morto den 24 ora i interná kasi 4.000 persona den hospital djaluna.
Promé minister Antonio Costa a bisa ku e gobièrnu sosialista ta preparando pa anunsiá restrikshonnan similar na esun imponé den mart durante e promé ‘lockdown’.
E kampaña ku a kuminsá djadumingu, ya a keda anulá i lo keda suspendé kompletamente si anunsiá un ‘lockdown’ nobo pa kontené e kasonan di Corona vírus.
