CAIRO, AP.- E torso di un estatua di un di e fáraonan di Egipto mas importante a wòrdu saká for di bou di tera den un suburbio na El Cairo kaminda el a wòrdu deskubrí resientemente.
Ku tres tonelada di peso, e torso mester a wòrdu halá ku un kran te ora ku e trahadónan a hib’é riba tereno seku, kaminda nan a kubrié ku un manta blanku.
Ministerio di Antigwedat a bisa ku e estatua ta wòrdu instalá den Museo egipsio den sentro di El Cairo. Despues e ta wòrdu hibá pa Gran Museo Egipsio, un museo ku ta habri pronto serka di Piramidenan di Giza.
E estatua kisas ta bira Ramses II, kende a subi trono na komienso di su segundo dékada di bida i goberná Egipto pa 60 aña, mas di 3.000 aña pasá. Posiblemente Ramses II a ekspandé e teritorio egipsio te loke ta Siria awor na ost i Sur Sudan
E estatua a wòrdu deskubrí siman pasá pa un ekipo arkeológiko aleman-egipsio den distrito di Matariya, na El Cairo.
