WASHINGTON, AP.- E direktor general di Uber Travis Kalanick a renunsiá ayera e foro di lidernan empresarial di presidente Donald Trump di akuerdo ku un memo interno ku The Associated Press a haña.
Kalanick a skibi ku el a papia ku Trump i “mi a lag’é sa ku ami no por partisipá den su konseho ekonómiko. Si mi uni na e grupo e lo no nifiká ku mi ta duna mi aprobashon na presidente ni su agènda, pero pa desgrasia el a keda malinterpretá”.
E kompania di servisio di transporte tabata ophetivo di krítika henter siman pa medio di e kampaña di bòikòt ku a kuminsá ora e hendenan a konsiderá ku tabata trata di kibra un wèlga di taksista na airopuerto JFK Na New York. E wèlga a bin ora Trump a duna e òrdu di suspendé temporalmente e programa di refugiadonan di e pais. Kalanick a kondena e òrdu ehekutivo.
