BOGOTA, COLOMBIA, AFP.- “Timochenko”, èks hefe di FARC, a rekonosé su responsabilidat pa ku mas di 20.000 sekuestro realisá pa e gueria aki na Colombia, den korte dilanti di víktimanan i e tribunal ku ta huzgando e krímennan di mas pió di e konflikto kolombiano.
Sintá dilanti di vários persona sekuestrá den pasado i nan famianan den un ouditorio di Bogotá, Rodrigo “Timochenko” Londoño a aseptá su responsabilidat pa e aktonan aki, kompañá pa seis èks komandante haltu mas di FARC, i akusá pa Hurisdikshon Spesial di Pas (JEP), kual a nase for di e inisiativa ku a pone fin na e gueria.
Na nòmber di 13.000 kombatiente ku a firma e akuerdo di pas na 2013, e èks rebelde e rekonosé “responsabilidat individual i kolektivo pa un di e krímennan d mas abominabel kometé” pa e organisashon marksista.
JEP a akusá e komandantenan pa mas ku 21.000 sekuestro i otro krímennan manera tortura kometé entre 1990 i 2016.
Segun e akuerdo di pas, e eks guerieronan mester yuda rehabilitá esnan afektá i papia bèrdat pa evitá di bai prizòn.
