BOSTON, AP.- Un eks presentadó di un kadena di televishon a bisa djárason ku Kevin Spacey a abusá seksualmente di su yu adolesente den un restorant di Nantucket i polis ta investigando esaki.
Heather Unruh a bisa na reporteronan ku su yu, ku tabatin 18 aña di edat tabata “fasiná” na momentu ku el a konosé e astro di “House òf Cards” den Club Car Restaurant na 2016, i ku Spacey a kuminsá “kumpra vários bibida pa su yu” i despues el a hinka man den su karson i mishi ku su parti íntimo.
Unruh a agregá ku su yu a drenta den pániko i ku e no por a kita man di Spacey for di su karson. Dado momentu Spacey a bai baño i asina e adolesente a logra hui riba rekomendashon di un muhé ku a mira e suseso, segun Unruh a indiká.
Unruh a bisa ku su yu no a reportá e abusu na e momentu ei paso e tabatin bèrgwensa. Un abogado di Spacey no a rospondé na mensahenan ku el a haña djárason pa duna komentario riba e kaso.
Unruh a bisa ku e adolesente a presentá un denunsia na polis siman pasa i ku a kuminsá ku un investigashon penal riba esaki. El a agregá ku su yu a entrega evidensia na outoridat, pero su abogado a bisa ku e no por a duna detaye riba loke a wòrdu presentá.
