WASHINGTON, USA (AFP).- E eks visepresidente di Donald Trump, Mike Pence, a bisa ayera ku e no ta apoyá e republikano den su karera presidensial pa un di dos mandato den White House. “No mester ta un sorpresa ku lo mi no apoyá Donald Trump e aña aki”, segun Pence a bisa den entrevista na Fox News.
Medionan norteamerikano a kalifiká e anunsio komo un “bòm eksplosivo”, apesar ku divishonnan profundo ku a pone ku e dos polítikonan a bin ta kana kaminda separá for di despues ku Trump a sali for di White House. Komo tal, un eventual apoyo di Pence mas bien lo ta un sorpresa.
E duo a tuma distansia di otro despues ku Trump a purba na preshoná Pence pa yud’é pa bòltu su derota den e elekshonnan di 2020 kontra di Joe Biden, atakand’é vários biaha via di retnan sosial pa motibu ku e no tabata di akuerdo ku su plannan.
Despues di vários intento ku no a duna resultado di parti di Trump i su aliadonan pa anulá e elekshon, e presidente e tempu ei a alentá su siguidónan pa marcha bai Kapitolio, kaminda e koro di “Kologá Mike Pence” por a keda skuchá.
Pence a bisa e kadena Fox ku Trump tabata “artikulando i persiguiendo un agènda den desakuerdo ku e agènda konservador ku kua nos a traha durante di kuater aña”.
