MONTEVIDEO, URUGUAY, AP.- E eks prizonero di Guantanamo, Abu Wa El Dhiab, den wèlga di hamber desde kasi dos luna, a atvertí djabièrnè ku lo stòp di tuma líkidonan tambe si e gobièrnu uruguayo no mantené su reklamo pa permitíe bandoná e pais i reuní ku su famia. “Ya mi a duna nan tempu. Djaluna mi ta bolbe kuminsá un wèlga, pero e biaha aki unu seku”, segun e refugiado sirio a bisa na prensa despues di señalá ku su wèlga di hamber tin 53 dia kaba.
E eks prizonero, kende a papia na árabe i tradusí na ingles i spañó, a mustra dispuesto na hiba su protesta pa último konsekuensianan. ” Ta importante pa boso sa ku mi no kier wòrdu atendé pa ningun dòkter, mi no ta bai aseptá pa wòrdu trasladá pa un hospital, mi no ta bai aseptá tampoko pa niun hende resusitá mi”.
Dhiab kende tabata mustra hopi flaku pero fuerte a papia durante mas di 70 minüt. El a akusá e gobièrnu uruguayo di no kumpli ku su promesa di trese su famia na e pais, manera el a bisa. Supuestamente el a wòrdu primintí esaki pa presidente Jose Mujica (2010-2015) na Guantanamo promé ku el a wòrdu liberá.
E sirio a atmití ku na momentu di a sali di Guantanamo, el a firma un kompromiso di keda dos aña den Uruguay pero a remarká ku el a hasi esaki solamente si a sigur’é ku su famia lo ta den e pais na momentu ku e yega, algu ku no a pasa.
