SUN PRAIRIE, WISCONSIN, MERKA, AP.- Un eksploshon di gas natural den por lo ménos dos edifisio di Wisconsin a laga un bombero morto i por lo ménos un dozein di herido, segun indikashon di outoridat djárason.
E eksploshon kousá pa un eskape di gas den sentro di Sun Prarie a destruí vários edifisio djamars anochi i a provoká un kandela ku a saka kolumnanan diki di huma ku tabata bisto desde vários kilometer leu,
Un otro bombero a resultá heridá ku heridanan grave, pero tabata den kondishon stabil, segun e teniente di polis di Sun Prarie Kevin Konopacki.
Kuater bombero mas, un polis i shete sivil a resultá heridá, segun indikashon di Konopacki.
E bombero ku a muri a traha den e departamento pa por lo ménos 10 aña, segun indikashon di e hefe di bombero di Sun Prarie Christopher Garrison.
“E departamento di bombero di Sun Prarie ta fuerte. Nos ta bai sali di e kos aki fuerte. E ta hasi nos doló pero nos lo sobrebibí”, asina Garrison a bisa.
Outoridat a evakuá edifisionan na kasi un kilometer leu di e sentro di eksploshon.
