WILLEMSTAD – Kompania di aviashon EZ Air, ku basenan operashonal na Kòrsou i Boneiru, a tuma desishon stratégiko pa introdusí e nòmber nobo ku ta Z Air. Esaki lo keda pronunsiá segun e zonido na Ingles, o sea pronunsiá na Papiamentu [zi-èr). E desishon aki ta sigui despues di un ‘claim’ di Easy Group, pa loke ta uso di e nòmber EZ Air.
“Despues di deliberashonnan tantu interno komo eksterno, e kompania a opta pa e rebranding pa Z Air. E kambio aki ta trese un kambio mínimo di disrupshon, inkluyendo un kambio relativamente chikitu na nos logo, nos avionnan, i nos marka. Ademas, nos kódigo di IATA aktual 7Z, ta hasi e eskoho aki tambe un ku ta lógiko,” segun e direktor di EZ Air, René Winkel.
Winkel a enfatisá ku, ounke e kompania no tabata di akuerdo ku e alegashon di violashon di marka hasí pa Easy Group, nan a skohe un rebranding na lugá di bai pa un proseso legal largu. “Manera a menshoná anteriormente, nos ta duna preferensia na enfoká nos esfuersonan riba futuro kresementu di nos aerolínea, en bes di krea mas gastu legal supstansial i gastamentu di tempu i energia na kosnan negativo.”
Winkel ta klarifiká enfátikamente, ku -kontrali loke sierto media a publiká- nunka no tabata un akshon legal òf algun kaso den Korte, laga para un veredikto kontra di EZ Air, pa loke ta trata e asuntu aki. “Ounke nos por keda sin ta di akuerdo ku posishon asumí pa Easy Group, nos interakshon ku nan semper tabata a base di un rèspèt mutuo i profeshonalismo,” segun Winkel a sigui bisa.
Implementashon gradual
E implementashon di e identidat nobo lo sosodé gradualmente den e siman ku ta bini. Segun direktor komersial di EZ Air, Sueyenne Dammerman. E rebranding aki lo no tin ningun impakto riba operashon di e kompania, pasaheronan, ni empleadonan.
“Realmente nos ta gradisí pa e sosten ku nos a risibí durante último simannan aki, no solamente for di nos empleadonan dediká, pero tambe for di hopi di nos pasaheronan leal. E sosten aki ta motivá nos ainda mas pa kontinuá mehorá nos produkto pa nos klientenan.”
