WASHINGTON, AP.- E hòmber ku a heridá un kongresista republikano i kuater persona riba un kampo di beisbòl na Virginia a aktua su so, segun indikashon di FBI djárason.
Tim Slater, ku ta enkabesá e divishon kriminal den e ofisina na Washington, a bisa den un konferensia di prensa ku James T.Hodgkingson no tabatin laso ku gruponan terorista.
E representante republikano Steve Scalise a wòrdu heridá gravemente den e atake di 14 di yüni. El a wòrdu someté na vários operashon i ta interná den hospital ainda. Su kondishon a mehorá ounke ainda e ta grave.
Scalise i otro kongresistanan republikano tabata praktikando pa e partido anual karitativo di beisbòl kontra demókratanan na momentu ku e pistolero a kuminsá tir’é. Polisnan di Kapitolio i otro agentenan a tira bek i a mata Hodgkinson, un persona desempleá ku un odio grandi kontra presidente Donald Trump i otro republikanonan.
Hodgkinson, di 66 aña, tabata biba na Belleville, Illinois, i tabata boluntario di e kampaña presidensial di Bernie Sanders. Durante lunanan promé ku e atake, e tabata bibando den su trùk den área di Washington, i tabatin mas di 200 munishon den su pertinensianan den un garashi, segun Slater.
Hodgkinson tabatin un lista di nòmber di seis kongresista, segun indikashon di Slater, pero no tabatin indikashon ku el a plania pa ataká nan. El a ninga di spesifiká si e personanan riba e lista tabata republikano ni si nan tabata riba e tereno di beisbòl. Hodgkinson tabata den kontakto via e-mail ku e dos senadornan demókrata di Illinois, segun Slater.
