QUITO, ECUADOR (AFP).- Un fiskal anti mafia di Ecuador ku tabata investigá e resien atake armá riba un planta di televishon a keda asesiná na Guayaquil, den loke ta un asesinato mas den e guera sangriento ku e pais ta biba pa motibu di bandanan di narko kriminal.
E asesinato di fiskal Cesar Suarez, ku nan a tira ora ku e tabata kore den su outo den un bario zùitost dje pais, a keda konfirmá pa e fiskal general, Diana Salazar.
“Mi ke ta enfátiko relashoná ku asesinato di nos kompañero Cesar Suarez: e gruponan di delinkuensia organisá, e kriminalnan, e teroristanan no por para nos kompromiso ku e sosiedat ekuatoriano”, Salazar a bisa.
Un responsabel di Ministerio Públiko a indiká na AFP ku Suarez tabata esun enkargá pa investigá kua grupo kriminal tabata tras dje espektakular asalto riba kanal TC dia 9 di yanüari, na momento ku e kanal di televishon tabata den pleno transmishon.
E vehíkulo di Suarez tabatin vários impakto di bala.
Ecuador durante di hopi aña tabata un pais liber di trafikashon pisá di droga. Pero tur kos a kambia i awor nan ta un sede prinsipal di tráfiko di droga pa Merka i Europa, ku bandanan kriminal bringando otro pa kontròl di teritorio.
