WILLEMSTAD.- Modernisashon teknológiko i inflashon tantu mundial komo lokal ta e motibunan prinsipal ku kompania di telekomunikashon Flow a hasi sierto adaptashon último tempu. Ta trata di adaptashon den nan ret di selular i tambe tarifanan di servisionan ku ta bende.
Direktor general di Flow, Bart Hofker den deklarashon pa EXTRA ta bisa ku e teknologia di 2G a bira antikuá i pa e motibu aki ta stòp ku esaki. “2G defakto no ta ofresé servisio di internèt i e ta karu den mantenshon. Ta p’esei mas ku 6 luna pasá Flow a kuminsá ku un kampaña di informashon pa anunsiá esaki”, Hofker ta splika.
Den e kampaña aki Flow a aserká klientenan ku un telefòn 2G direktamente pa medio di mensahe di teksto (sms) i avisonan. A ofresé e klientenan aki un telefòn nobo 4G kontra e mesun preis ku Flow ta kumpra esakinan.
“Nos klientenan a reakshoná hopi bon riba e kampaña aki. Mi ta komprondé ku e por ta molestioso pa kambia di telefòn, pero un grupo grandi a bini nos tienda pa kumpra un telefòn nobo i mi mes a papia ku vários di nan.”
Papiando ku klientenan Hofker ta bisa ku el a haña e impreshon ku nan tabata bon informá ku lo a stòp ku e servisio di 2G, pero a skohe pa keda usa nan telefòn te ora esaki no ta bai mas. “Nan no tabata bou di strès i tabata komprondé ku e kompania mester hasi kambio, pues mi no ta rekonosé e reklamonan ku tin ku klientenan lo ta rabiá ku e kambionan.”
E gerente general ta enfatisá ku no ta Flow so ta sakando 2G for di servisio pero ku esaki ta un tendensia mundial mirando desaroyo teknológiko. “Na Merka ta asta sakando telefònnan 3G for di servisio.
TARIFA
Relashoná ku oumento di tarifa pa servisionan ku Flow ta ofresé, Hofker ta bisa ku ta kalkulá tarifanan di e kompania a base di gastu pa hasi negoshi. “Echo ta ku mundialmente pero tambe na Kòrsou tin inflashon, esta oumento di kosto i Flow tambe tin ku adaptá su tarifanan konforme esaki.”
Riba resibu ku a saka na fin di febrüari Flow ta anunsiá ku entrante promé di aprel ta subi tarifanan ku 4,5%. Segun Hofker atrobe ta informá klientenan adelantá i na tempu di kambionan.
“E oumento di tarifa ta solamente pa internèt i televishon. Pa servisio di ‘voice’ no ta hisa tarifa.” E oumento di tarifa di otro banda ta enserá ku e kliente ta haña mas data riba su telefòn i/òf un spit mas haltu di internèt na kas.
Ta di 2 aña konsekutivo ku Flow ta ahustá su tarifanan. Hofker ta bisa ku durante pandemia e kompania a apsorbá e inflashon asta den un aña ku e sifra di inflashon lokal tabata alrededor di 7 porshento. “Pero no ta posibel mas pa Flow mes sigui apsorbá e inflashon.”
