WILLEMSTAD.- Sekretario di estado hulandes di Asilo Eric van der Burg ta di opinion ku Kòrsou i Aruba ta karga un peso grandi ku e fluho enorme di venezolanonan ku pa añanan kaba ta hui bini e islanan. “Si bo mira e kantidat di hende ku aktualmente ta na Aruba for di Venezuela, i si bo tradusí esei pa e situashon na Hulanda, e ora ei na Hulanda nos lo mester a duna akohida na kasi 2 mion hende.”
Van der Burg resientemente a hasi un bishita di trabou na Aruba i Kòrsou. Den un entrevista ku Sharina Henriquez di Ret Karibense e ta kompará e situashon na Kòrsou i Aruba ku e situashon na Hulanda. Van der Burg: “Promé mi mester pèrkurá pa komo sekretario di estado mi mes tin mi asuntunan na òrdu na Hulanda. Na Hulanda mi tin problema pa duna akohida na e 130 mil hendenan ku tei for di Ukrania i sobrá di mundu.”
Organisashonnan di yudansa ta kalkulá ku na Aruba tin 15 mil pa 20 mil hende indokumentá. Ora nan drenta nan por pidi asilo i no ta sera nan manera na Kòrsou. Pero tampoko no a regla akohida kaminda segun e tratadonan internashonal di refugiado i asilo mester hasi esaki sí.
Pa sobreviví e mayoria di hende indokumentá ta traha na Aruba ilegalmente, loke gobièrnu ta tolerá. Banda di esaki tin un lista di espera largu di 1.700 buskadó di asilo na Aruba ku un grupo di kolaboradó di IND hulandes ta hèndel. E kapasidat pa hasi esaki no ta sufisiente: Aruba a pidi Van der Burg pa mas hende di IND. E sekretario di estado di Hustisia i Seguridat ta remarká ku tin un diferensia grandi den e prosesamentu di petishon di asilo: Aruba ta rechasá 98 porshento kaminda Hulanda ta atmití 70 porshento.
Na Kòrsou e buskadó di asilo ofisialmente no ta eksistí, pasobra e pais te ainda no a laga e tratadonan p’esaki drenta na vigor. Den práktika esaki ta nifiká ku e isla ta sera refugiado, buskadó di asilo i otro hende indokumentá den e baraknan. Den entrevista di Ret Karibense ta pidi e sekretario di estado hulandes si el a insistí serka gobièrnu di Kòrsou pa nan introdusí tratado internashonal? “Esaki no a papia di dje den e kombersashonnan.” Segun Van der Burg generalmente Hulanda ta haña ku tur pais na mundu, pues e paisnan di Reino tambe, mester sostené e tratadonan di e derechonan di strañero. “Pero mi ta haña ku mi no mester tuma mas riba mi kuenta ku mi no por hèndel.”
