WASHINGTON, MERKA, AFP.- Fondo Monetario Internashonal (FMI) a yega na un akuerdo ku Honduras pa amplia un krédito di 222 mion dòler na un total di 530 mion na krédito pa e pais, kontra krísis di e coronavirus.
“E pandemia COVID-19 tin un impakto atverso importante riba e kondishon sosial i ekonómiko na Honduras”, segun informashon di FMI den un komunikado, kual su maneho mester reuní durante e próksimo simannan pa aprobá e ampliashon aki.
FMI ta proyektá ku 2020 di e ekonomia di Honduras lo sufri un kaida di 3,3%.
E entidat multilateral ya a aprobá fiansanan di emergensia pa 50 pais pa kasi 18.000 mion dòler, pa e lucha kontra e impakto di salú i ekonómiko dor di e pandemia, segun indikashon di e bosero di e institushon, Gerry Rice.
