DAVOS, SUISA, AP.- E minister di Finansa di Fransia a bisa djárason ku su pais lo aplasá e intenshon pa imponé impuesto riba negoshinan digital di teknologia manera Google i Facebook, si Merka akordá pa no apliká sanshon di represaya.
E akuerdo entre Bruno Le Maire i e sekretario di Finansa di Merka, Steven Mnuchin, lo evitá un káos komersial entre Merka i Union Europeo relashoná ku e merkado lukrativo di teknologia aki.
Le Maire a bisa ku Fransia lo aplasá e impuesto digital te den luna di desèmber pero ku lo no eliminá esaki kompletamente te ora e paisnan yega na un akuerdo internashonal.
Merka a apstené di introdusí impuesto komo represaya. Merka a menasa ku e lo pone impuesto riba biña, keshi i otro produktonan franses den pasado.
Fransia a establesé den yüli ku lo introdusí 3% di impuesto riba entrada di e kompanianan digital den e nashon europeo aki. E medida ta pa evitá ku e kompanianan multinashonal aki ta keda sin paga impuesto na UE kaminda nan ta operá. Mayoria biaha e kompanianan aki no ta paga nada di impuesto.
E gobièrnu di Merka a reakshoná bisando ku lo introdusí impuesto riba produktonan franses. Presidente Donald Trump a asta indiká ku lo introdusí impuesto riba outonan fábrika na UE.
