PARIS, FRANSIA, AFP.- Fransia entre e paisnan ku mas dia di skol habrí durante di e pandemia a eksperensiá un wèlga importante di maestronan di skol, kansá pa e asuntu gubernamental di e krísis di salubridat, faltando tres siman di e elekshonnan presidensial.
Den kareda di 77.500 persona a manifestá den henter e pais, 8.200 di nan na Paris segun e ministerio di interior, ku a registrá 136 mobilisashon den henter Fransia.
“Ta eksperensiando un rabia, fadá. Tin un sentimentu real di frustrashon i e gobièrnu tin di realisá esaki”, asina Guislaine David lider sindikal di maestronan mayoritario den primaria Snuipp-FSU a bisa.
For di ora skolnan a kuminsá bèk dia 3 di yanüari, despues di fakansi di dianan di fiesta di desèmber, gobièrnu a anunsiá ta ku tres protokòl diferente den skolnan, loke a sòru pa basta krítika di parti di maestronan.
“For di despues ku e krísis di e pandemia a kuminsá ya nos tin e di 30 protokòl”, asina Vanessa Cognet direktor di un skol chikí na Chateldon a bisa, denunsiando ku e instrukshonnan nobo ta yega un dia promé sea atardi òf anochi.
Djaluna anochi promé minister Jean Castex a anunsiá e último protokòl, suavemente fleksibel pa kalma e ánimo, pero e maestronan a mantené nan wèlga. Ora detektá un kaso positivo den klas, e sobrá alumnonan tin di hasi te asta 3 tèst na kas pa nan por sigui bin skol, sin nesesidat di hasi un prueba antigén òf PCR promé.
E medidanan anterior a sòru pa filanan largu dilanti di botikanan di mayornan ku den hopi kaso a bandoná nan trabou pa nan por tèst nan yunan pa asina nan por bai skol bèk e siguiente dia den kaso ku nan ta negativo.
