MADRID, AP.- Un polítiko di Catalonia di rango haltu a pidi presidente di gobièrnu spañó Mariano Rajoy pa aseptá e ofresementu di e mandatario katalan Carles Puigdemont pa dialogá, atvirtiendo ku esaki por ta e último.
Carles Campuzano, bosero di Parlamento nashonal pa Partido Demókrata di Catalonia, kual Puigdemont ta pertenesé na dje, a bisa ku e oferta di e lider katalan pa suspendé un deklarashon di independensia pa fasilitá kombersashonnan tabata un akto generoso ku a laga portanan pa un posibel diálogo habri.
Campuzano a pidi Rajoy pa probechá di e oportunidat, i a agregá ku esaki por ta e último pa nan por yega na un solushon benefisioso pa ámbos parti.
Spaña a deskartá un kombersashon miéntras Puigdemont a sigui aktua ilegalmente. Den oranan trempan di djárason, Rajoy a pidi Puigdemont pa aklará si el a deklará independensia djamars i a insinuá ku si ta asina, Spaña lo apliká un lei pa retirá un parti òf tur e outoridat di outonomia di Catalonia.
MADRID TA DUNA CATALONIA ULTIMATUM PA DUNA DEKLARASHON
E gobièrnu di Spaña a duna e lider separatista di Catalonia sinku dia pa e aklará si su afirmashon ta un deklarashon formal di independensia, i a atvertí ku e kontesta lo dependé si ta apliká fakultatnan konstitushonal (nunka usa anteriormente) pa redusí outonomia di e region.
Despues di a menasá ku invoká un artíkulo di konstitushon spañó pa reafirmá kòntròl riba e region rebelde, presidente Mariano Rajoy a bisa ku e kontesta di Carles Puigdemont na e ultimatum ta krusial pa disidí “tokante e akontesimentunan den próksimo dianan”.
Puigdemont a anunsiá djamars ku e lo probechá di e viktoria di e referèndem di 1 di òktober pa prosedé ku e deklarashon di independensia katalan, pero a proponé pa kongelá su akto pa permití e diálogo i mediashon ku gobièrnu di Madrid.
Polis spañó mester a usa forsa den un intento pa impedí realisashon di e referèndem i e imágennan publiká a kousa simpatia na fabor di e separatistanan.
Rajoy, kende su gobièrnu a wòrdu kritiká debí na e violensia polisial, a indiká ku esaki ta falta di e separatistanan pa kuminsá ku protesta riba kaya i a señalá ku “niun hende por ta orguyoso” di e imágen proyektá pa Spaña ku e referèndem di restu di mundu.
