LOS ANGELES, AFP.- Gabby Petito e hóben merikano ku a disparsé miéntras e tabata biaha ku su frei, a muri horká, di akuerdo ku e outopsia, asina outoridatnan a informá.
“E kousa di morto ta horká, di e manera ei por kalifiká komo homisidio”, asina dòkter Brent Blue a bisa den un rueda di prensa ayera na Wyoming, kaminda a haña e kurpa di e hóben di 22 aña. E desaparishon di Petito a konmové Merka.
E kurpa di Gabby a keda haña den luna di sèptèmber den mondinan di Wyoming. Tin indikashon ku e kurpa tabata den e mondi entre tres pa kuater siman. Su famia a reportá su desaparishon dia 11 di sèptèmber pasa, na momentu ku e hóben di 22 aña aki a disparsé misteriosamente. FBI a pone un aresto kontra di Brian Laundrie, e frei di Petito ku ta keda buská komo persona di interes den e kaso aki.
