PARIS, AP.- Míles di manifestante di e movementu chaleko hel, a marcha riba e di 17 fin di siman konsekutivo na Paris i otro siudatnan, ku hopi momentu di tenshon den e kapital franses, pero sin indikashon ku e chokenan grave òf violento manera a sosodé durante manifestashonnan anterior.
Polis a tira gas lakrimógeno i kañon di awa na final di e manifestashon na Paris. Algun di esnan presente ku kara pinta pretu i bandera pretu, a ninga di bandoná Champs Elysees, e avenida prinsipal di e kapital. Un marcha pasífiko a sali for di e avenida aki algun ora promé.
No tabatin disturbionan manera e siudat a eksperensia durante protestanan den pasado, kaminda a manifestantenan i kima outo, tira piedra i baiskel kontra polis i destrosá tiendanan.
E ministerio di Interior a informá ku 7.000 manifestante a marcha na Paris, kual ta riba e 5.600 di siman pas, segun informashon di BFMTV. E ministerio no a entrega ningun sifra pa konta esnan ku a partisipá den manifestashonnan den otro parti di Fransia.
E marcha na Paris, kual a sali desde Arc de Triomphe rumbo pa Hardinnan di Luxemburg, kaminda Senador ta, tabata enkabesá pa un grupo di hende muhé ku tabata eksigiendo igualdat di derechi. Djabièrnè tabata Dia Internashonal di Hende Muhé.
