DEN HAAG (AFP).- E lider ultraderecha di Hulanda, Geert Wilders, a anunsiá ku a bira imposibel pa e forma gobièrnu apesar di su viktoria elektoral di novèmber, pa falta di apoyo di partidonan ku kua el a buska pa forma un koalishon.
“Mi por bira promé minister solamente si tur e partidonan di koalishon apoyá mi. Esei no ta e kaso”, segun Wilders a indiká riba e ret sosial X, kuater luna despues di elekshon parlamentario.
E viktoria di Wilders, di e partido di libertat PVV, a kousa asombro na Hulanda i den Europa. Pa forma mayoria, el a purba na konvensé e partido liberal VVD, tambe e partido di kampesino BBB i e sentralistanan di NSC, pero e negashonnan a frakasá.
“Ami tabata ke un gobièrnu di derecha, ku ménos asilo i inmigrashon. Hulandesnan na promé lugá”, segun el a skirbi.
Den e sistema polítiko hulandes, hopi fragmentá, ta normal ku sa tin lunanan di negoshashon pa forma un gobièrnu.
Novèmber último, Wilders a logra 37 di e 150 asientonan di Parlamento, pa kua e tabatin mester di apoyo di 39 parlamentario mas pa yega un mayoria di 76.
Prensa hulandes awor ta mira ku e pais por move den direkshon di formashon di un gobièrnu di tèknokratnan.
