MARIARA (AFP).- “Libertat, libertat, libertat!”, ta gritu di un multitut eufóriko ora ku Maria Corina Machado subi un trùk pa un diskurso di kampaña. E prinsipal opositor venezolano ta den kampaña pa enfrentá e presidente Nicolas Maduro dia 28 di yüli, ounke outoridatnan a rechasá su kandidatura.
Gobièrnu ta akus’é di korupshon i di a pidi un invashon estranhero, i a prohibí su kandidatura. No tin ningun chèns ku e por inskribí pa e elekshon presidensial.
“Nos ta den momentonan krusial, e régimen ke pone nos sinti nos mes sin orientashon i derotá, esaki na momento ku nos ta mas fuerte ku nunka”, segun el a bisa dilanti di un multitut na Mariara, un siudat industrial na 140 km wèst di Caracas.
Machado ta nenga tur e akusashonnan i den su diskurso no a menshoná ni un palabra dje sanshon ku ta strob’é pa ku trabounan públiko pa 15 aña, loke ku e ta konsiderá komo inbálido i kontra di konstitushon.
Su inhabilitashon a keda ratifiká pa Korte Supremo, Fuentenan di chavismo i oposishon ta deskartá ku e desishon lo kambia. E tempu pa inskribí é kandidaturanan ta di 21 pa 25 di mart.
Ningun hende sa kiko Machado lo hasi ora ku e fecha ei yega. Ekspertonan ta mustra riba e posibilidat ku e òf su koalishon lo eligí un sustituto, òf lo yama pa bòikotiá e elekshon.
Machado den òktober último a bari den e pre-elekshon pa eligí kandidato di koalishon opositor Plataforma Unitaria, ku un 92% di votonan.
El a definí su viktoria komo un mandato di pueblo pa derotá Maduro, ku ta aspirá un di tres periodo di seis aña. E mandatario a yega na poder den 2013, despues di morto di Hugo Chavez (1999-2013), i a keda re-eligí den 2018 den un elekshon ku hopi sospecho di froude.
Segun enkuestanan, si Machado por partisipá lo e derotá Maduro pa márgen amplio i pone fin na 25 aña di chavismo.
Den último dékada mas di shete mion venezolano a bandoná e pais pa motibu dje krísis ekonómiko i polítiko.
