PORT-AU-PRINCE, HAITI (AFP).- Gèngnan ta ekstendiendo nan dominio den e kapital di Haiti, segun un atvertensia di e kordinadó spesial di ONU den e pais karibense, na momento ku e negosiashonnan pa forma outoridatnan di transishon parse ta yegando na un fin.
“Den último dianan e gèngnan a avansá den zonanan nobo dje kapital”, segun Ulrika Richardson. “Nos ta mira hendenan ta yegando serka ku heridanan di bala”, segun el a bisa den un video for di Haiti, agregando ku “masha hopi hende tin ku hui for di nan kas i barionan” pa motibu di gruponan armá ku ta avansando.
Segun Nashonnan Uní, e gèngnan ei, akusá di abusunan manera asesinato, violashon, sakeo i sekuestro, ta kontrolá 80% dje kapital.
“E situashon den Haiti, partikularmente den e kapital, ta hopi preokupante i alarmante”, segun Richardson, ku a deskribí un bida diario marká pa “kamindanan blòkiá, zonido di tiru i hopi tenshon den kayanan”.
Haiti a bin ta biba simannan di káos for di momento ku gèngnan armá a lanta kontra di e promé minister Ariel Henry, ku atakenan riba aeropuerto, wardanan di polis, prizònnan i otro edifisionan públiko. Henry a goberná for di despues di asesinato dje presidente Jovenel Moise den 2021 pero, den último simannan, su posishon no a gosa mas di sosten den un pais kaminda den 2016 tabatin e último elekshon.
“Ménos di mitar di e sentronan sanitario di Port-Au-Prince ta funshonando normalmente. “Segun a keda atvertí, mirando e situashon aktual nan ta kreando e posibilidat pa un epidemia di kólera”, di akuerdo ku Tedros Adhanom, direktor general di Nashonnan Uní.
Ayera Merka a evakuá mas di 90 di su siudadanonan ku un buelo for di e siudat nort di Cap-Haitien ku a bai baha na Miami i biahe di vários helikòpter for di Port-Au-Prince pa Rep. Dominicana.
