MONTEVIDEO, URUGUAY (AFP).- Mas di 4.700 famia mester a sali for di nan kas na Uruguay pa motibu di inundashon den vários punto dje pais despues di tormentanan severo, ráfaga hopi fuerte di bientu i áwaseru, segun a keda informá pa e agensia uruguayo ku ta atendé ku krísis.
“Te na e momento tin 4722 persona ku a sali for di nan kas, di kua 995 a keda evakuá den sentronan i 3.727 a bai keda serka famia òf amigunan.
Nuebe dje 19 siudatnan dje pais tin personanan ku a bandoná nan kas despues di alerta kòrá pa sistemanan meteorológiko atverso. Florida i San Jose, den sentro zùit dje pais, ta esnan mas afektá.
“Florida ta e departamento mas kompliká”, segun e presidente Luis Lacalle Pou despues di a rekoré e zonanan afektá huntu ku e direktor nashonal di emergensia, Santiago Caramés.
Den Florida, e áwaseru persistente a pone ku e riu Santa Lucia Chico a krese, alkansando 10.67 meter.
Dado momento kasi 43.000 kliente dje empresa estatal di elektrisidat UTE tabata sin energia, despues di un pik di 116.000 afektá den oranan di mardugá.
E Instituto Nashonal di Meteo (Inumet) a reportá rachanan máksimo di bientu di 137 kilometer pa ora den parti nort, serka di frontera ku Brasil.