SIUDAT DI PANAMA, PANAMA, AFP.- E gobernador di Guna Yala, Erick Ivan Martelo, a keda detené pa polis pa motibu ku e tabatin 79 kilo di droga den su outo, segun informashon di medionan lokal.
E detenshon di e funshonario, di e mesun partido ku presidente Laurentino Cortizo a wòrdu realisá despues ku polis a par’e djaluna anochi den lokalidat di Las Garzas de Pacora.
Cortizo a skibi riba su kuenta di Twitter ku Martelo lo “keda retirá inmediatamente” pa un delito kometé, sin spesifiká kiko. Sinembargo, medionan lokal a identifiká Martelo komo un di e personanan detené durante e kontròl di polis.
E minister di Seguridat Juan Pino a bisa ku a haña 79 pakete di kokaina durante e operashon. Polis a publiká un video kaminda por opservá e paketenan di droga di mas o ménos un kilo kada unu, skondé den stulnan i e outo.
