LONDON, REINO UNI, AFP.- Gobièrnu britániko a firma e dekreto di ekstradishon di e fundadó di WikiLeaks, Julian Assange pa Merka, kaminda e ta wòrdu buská pa publikashon masivo di dokumentonan konfidensial.
WikiLeaks i konosínan di Assange a anunsiá ku e lo apelá e desishon.
Den aprel, hustisia britániko a emití un òrdu formal pa entregá e fundadó di WikiLeaks na Washington, despues di un saga hudisial di vários aña, pero e minister di Interior, Priti Patel, mester a firma esaki kual el a hasi ayera.
“Konforme lei di ekstradishon di 2003, e minister mester firma tur òrdu di ekstradishon si no tin un motibu ku ta prohibié di hasi esaki”, segun indikashon di un bosero di e ministerio.
Merka ke huzga Assange pa spionahe kaminda e por haña un kondena di 175 den prizòn si e wòrdu deklará kulpabel pa publikashon di 700.000 dokumento militar i diplomátikonan merikano sekreto, spesialmente di Irak i Afganistan.
Assange ta detené den un prizòn na London for di 2019. El a wòrdu detené den embahada di Ecuador na London, despues ku presidente Lenin Moreno a retirá e protekshon ku su predesesor a konsed’é.
