SAN FRANSISCO, AP.- E gobièrnu di presidente Donald Trump a apelá e desishon di un hues federal djamars, kende a blòkiá su desishon di pone fin na un programa ku ta ampará e deportashon di sentenar di míles di inmigrante hóben. Ademas, e gobièrnu a anunsiá su intenshon di pidi Korte Supremo pa revisá e asuntu asta promé ku e pronunsiamentu di e tribunal.
E abogadonan di Departamento di Hustisia a bisa den un dokumento presentá den Korte di Apelashon di 9 Sirkuito ku e desishon di febrüari di e hues federal William Alsup ta impedí e mandatario di pone fin na e programa di DACA.
Den un komunikado separá, e Departamento di Hustisia a bisa ku e tin intenshon di pidi Korte Supremo federal pa revisá e asuntu.
E sekretario di Hustisia, Jeff Sessions, a afirmá den un komunikado ku e desishon di solamente un hues federal riba DACA a kontradesí e “lei i sentido komun”.
Den un desishon di 9 di yanüari, Alsup a bisa ku e abogadonan ku ta sostené DACA demostrá ku klaridat ku e inmigrantenan hóben “por sufri prehuisionan grave i ireparabel” sin intervenshon di un korte. E hues a afirmá tambe ku e abogadonan di e demandantenan tin gran posibilidat pa gana di korte.