LONDEN (AP).- Shete hòmber a keda arestá pa sospecho di terorismo na Gran Bretaña, asina polis a informá ayera, un dia despues di a anunsiá e kaptura di seis supuesto terorista mas.
E shete hòmbernan a keda detené na kuminsamentu di siman ora polis a haña vários tipo di arma den nan vehíkulo durante un kòntròl di rutina, asina outoridatnan a bisa.
En kambio, den un operashon antiterorista, a detené e seis individuonan djaweps mainta durante vários redada, inkluí un den un kas serka di Parke Olímpiko di Londen.
Den e kaso aki, polis a insistí ku e supuesto atakenan ku e personanan detené a planiá no tabatin ningun relashon ku e Weganan Olímpiko di Londen ku ta kuminsá dia 27 di yüli.
Outoridatnan a bisa ku e arestonan a tuma lugá den un investigashon realisá despues ku e vehíkulo di e sospechosonan a wòrdu kontrolá den un karetera na South Yorkshire dia 30 di yüni i hibá un depósito di vehíkulonan pasobra e no tabatin seguro.
Nan a bisa ku despues nan a haña ‘ armanan di kandela, i otro tipo di armanan i material’ den e outo, loke a pone polis sigui i detené e shofùr, un pasahero i otro sospechosonan.
Steve Field, e bosero di promé minister David Cameron, a insistí ku no tabatin motibu pa alarma pa e detenshonnan ku a tuma lugá promé ku e Weganan Olímpiko. Polis a informá ku tres di e hòmbernan a keda detené djamars, tres djarason i un djaweps. Seis di nan ta di mas o ménos 20 aña i nan ta biba den e zona di West Midlands, Inglatera, miéntras un ta di West Yorkshire.
E hòmbernan a keda arestá pa e sospecho ku nan a prepará òf a instigá aktonan di terorismo. Outoridatnan ta investigá e ophetonan ku a haña den e vehíkulo.
