LONDON, AP.- Gran Bretaña ta spera ku un muraya di betòn di 4 meter ta duna e resultado ku no por a logra ku bewakernan. Esaki ta pa para inmigrantenan ku ta yega via e haf franses di Calais.
E minister di Interior, Robert Goodwill, a anunsiá e siman aki ku e barera di un kilometer di largu konstruí komo parti di un pakete di seguridat di 23 mion dòler a wòrdu akordá entre Gran Bretaña i Fransia. Goodwill a bisa djamars na legisladornan ku e konstrukshon di e muraya, pa para e karetera prinsipal ku ta yega e haf lo kuminsá dentro di poko tempu. Míles di persona, mayoria di Medio Oriente i Afrika, a realisá biahenan largu i peligroso pa Calais, na nort di Fransia, ku e speransa di yega Gran Bretaña. Mayoria ta biba den kampamentunan konosí komo “the jungle” ku outoridatnan franses a primintí di desmantelá.
Pa desanimá i mantené e hendenan leu di treinnan di karga di Eurotunel, haf i kayanan, outoridatnan a manda mas polis pa vigilá.
Pero migrantenan desesperá ta usando táktikanan kada biaha mas peligroso pa yega e paisnan den wèst.
