CARACAS (AP).- e lider di oposishon na Venezuela, Juan Guaidó, a drenta e pais manera el a primintí i na su yegada el a hasi un apelashon riba su siguidónan pa subi kaya i protestá pa dje forma ei demonstrá “e gran forsa di determinashon”. Guaidó a regresá Caracas djaluna despues di mas ku un siman den eksterior, retando òrdunan ku tabatin pa e no bandoná e pais.
Guaidó a bai riba un gira den diferente nashon buskando sosten di paisnan bisiña den Sur-Amerika den su intento pa kita Presidente Nicolas Maduro for di poder.
Guaidó a hasi apelashon riba su siguidónan pa yena kayanan di e siudat pa protestá kontra e poder di Maduro. E opositor a aterisá na e airopuerto prinsipal di Venezuela, djis pafó di Caracas i bisando ku el a pasa sin problema pa su chekeonan na imigrashon.
Guaidó kende ta e presidente di Asamblea Nashonal, ta insistí ku e ta e presidente interino legítimo den e pais pa motibu ku e re-elekshon di Maduro aña pasá tabata inválido.
