BRUSELAS, AP.- E lider opositor venezolano Juan Guaido a bisa djárason na Brusleas ku e kier pa Union Europeo amplia su sanshonnan kontra miembronan di e gobièrnu di Venezuela, komo forma pa preshoná e gabinete pa realisá elekshon presidensial liber i demokrátiko den e pais suramerikano aki.
El a papia durante un gira global, tokante un prohibishon di biahe den su kontra na Venezuela. E kier haña respaldo di su aliadonan pa deshasí di e gobièrnu di presidente Nicolas Maduro i kier reuní ku presidente Donald Trump atrobe na Washington.
E mandatario merikano tabata na e Foro Ekonómiko Mundial na Davos Suisa djamars i djárason, kaminda e dirigente opositor venezolano lo presentá djaweps pa kontinuá ku un “agènda intenso” kual por tres’e Spaña i Fransia.
E gobièrnu di Trump a duna su respaldo na Guaido un aña pasa rekonosiendo e komo presidente interino di e pais. Guaido ta presidente di e Asamblea Nashonal di Venezuela.
Mas o ménos 60 pais a rekonosé Guaido, indikando ku e elekshon di Maduro na 2018 tabata froudulento i no bálido. Sin embargo e lider opositor no a logra kita Maduro di poder, mirando ku e ta kontrolá institushonnan klave di gobièrnu, inkluyendo Tribunal Supremo di Hustisia, e hunta elektoral i ehérsito.
