CARACAS, AP.- E lider opositor Juan Guaidó a pidi e venezolanonan pa realisá protestanan kontra e gobièrnu di presidente Nicolás Maduro riba 1e di mei.
Guaidó ta presidente di Asamblea Nashonal, kaminda oposishon ta mayoria, i kende a deklará su mes komo presidente enkargá di Venezuela den yanüari, argumentando ku e elekshon di Maduro a sosodé di forma ilegal i ku elekshon nobo i un presidente nobo ta e úniko kos ku por saka e pais for di su krísis ekonómiko i humanitario.
Maduro ta indiká ku Guaidó ta wòrdu manipulá pa Merka den un intento golpista i a rechasá tur petishon pa e renunsiá komo presidente di e pais latinoamerikano.
