PORT-AU-PRINCE, HAITI, AP.- Míles a manifestá djadumingu kontra korupshon, serando kaminda i paralisando gran parti di e kapital haitiano pa eksihí renunsia di presidente Jovenel Moise. Un persona a muri.
E manifestantenan a kima tayer i tira piedra durante e marcha den Port-au-Prince. Tráfiko entre algun siudat a wòrdu interumpí dor ku e manifestantenan a blòkia e kareteranan ku outo, piedra i otro ophetonan i mayoria tienda i pòmp di gasolin a sera.
Polis a pone barikada serka di e palasio presidensial i a tira gas lakrimogeno kontra manifestantenan ku a purba aserka e residensia.
E manifestantenan ta eksihí un investigashon profundo relashoná ku e fondonan di supsidio di krudo pa Venezuela den un programa di Petrocaribe. Un investigashon di Senado a determiná ku por lo ménos 14 funshonario di gobièrnu a malversá 3.800 mion dòler durante gobernashon di eks presidente Michel Martelly.
E krísis venezolano a obligá e pais pa redusí òf suspendé su karganan di Petrocaribe pa Venezuela, kual a kousa problema ku generashon di koriente riba e isla. Mayoria haitiano tin koriente solamente pa algun ora durante dia.
