MERKA, AP.- Ehekutivonan di United Airlines a bisa djamars ku ta demasiado trempan pa sa si e insidente di siman pasa, kaminda un pasahero a wòrdu saká di forma brutu i lastrá di un di e buelonan, ta perhudikando benta di ticket. E direktor ehekutivo a komentá ku niun hende ta risibí retiro pa e insidente.
Oscar Munoz i otro ehekutivonan a diskulpá atrobe promé ku a deliberá tokante resultadonan finansiero nobo di e aerolínea ku analista i reporteronan.
Munoz a bisa ku e ta asumí responsabilidat pleno pa korigí tur kos despues di e insidente di 9 di aprel na bordo di un buelo di United Express na Chicago. El a bisa ku e aerolínea lo tin mas informashon e luna aki, unabes a revishon di su reglanan di buelo ‘èkstra yen’.
