NEW YORK, AP.- Funshonarionan di e gobièrnu di Honduras ta sigurá ku dokumentonan hudisial merikano no ta mustra ningun prueba kriminal kontra presidente Juan Orlando Hernandez, apesar ku esakinan ta mustra ku e mandatario a wòrdu investigá pa e agensia antidroga merikano.
E revelashonnan di e investigashon a forsa e gobièrnu di Hernandez pa emití un komunikado djaweps anochi bisando ku lidernan di narkotráfiko a akusá Hernandez i su kolaboradornan di 2015 dilanti e gobièrnu di Merka dor ku nan tabata “rabia” ku Hernandez a persiguí i ekstraditá nan.
Ni DEA ni fiskalnan merikano a duna komentario riba e investigashon aki.
E dokumentonan hudisial ta parti di algun moshon preliminar den e huisio di e presidente su ruman, Juan Antonio “Tony” Hernandez, arestá na aña 2018 na Miami i akusá di organisá importashon di vários tonelada di kokaina den e pais durante vários aña. E huisio ta programa pa kuminsá den sèptèmber.
E dokumentonan merikano ta mustra ku presidente Hernandez ta forma parti di un grupo di individual investigá pa DEA for di 2013 pa partisipá “den tráfiko di droga na gan eskala i aktividatnan di labamentu di plaka relashoná ku importashon di kokaina na Merka”.
