HONG KONG, AP.- Despues di un dia di protesta, gas lakrimógeno i konfrontashon ku polis, studiante i aktivistanan na Hong Kong a primintí di kontinuá ku nan manifestashonnan kontra un proyekto di lei di ekstradishon ku a generá gran preokupashon pa ku un influensia mas grandi di China i afektá e libertat sivil den e eks kolonia britániko. E lei ta hasi posibel pa sospechosonan wòrdu ekstraditá pa China i wòrdu enhuisiá einan.
E aktonan di violensia riba e teritorio semi outónomo chines ta pasando dor di su krísis polítiko mas grave aktualmente.
E manifestantenan a reuní djamars anochi pafó di e edifisio di gobièrnu. Nan a kuminsá preshoná polis den oranan trempan di djárason mainta. E agentenan a usa gas lakrimógeno i pepperspray pa kontené e multitut.
E multitut, ku ta konsistí di mayoria hóben, a tira bareranan abou i konfrontá ku polis.
Un protesta kontra e medida di ekstradishon a atraé míles di persona. E lider di Hong Kong, Carrie Lam, a bisa djaweps ku e manifestashon pasífiko a kombertí den un “lantamentu organisá”.
Tabatin agentenan tambe ku a resultá heridá, algun gravemente pa herida di piedra, bòter, señalnan di tráfiko, barikada i otro ophetonan ku e manifestantenan tabata tira. E bosero di polis Gong Weng Chun a defendé e uso di gas lakrimógeno i munishon no letal, señalando ku lo no tabata nesesario pa usa esakinan si e agentenan no a wòrdu leshoná gravemente.
Te ainda 72 persona a wòrdu trasladá pa shete hospital te ku djárason anochi, segun indikashon di Outoridat di Hospital di Hong Kong. Di e personanan aki, 41 a fayesé.