MERKA, AP.- Un trahadó di mantenshon a bisa djárason ku el a pidi un trahadó di hotèl Mandalay Bay pa yama polis i denunsiá ku un hòmber a tira den e hotèl promé ku e agresor a kuminsá tira desde su suite na un piso haltu. E hòmber a tira kontra un multitut di hende ku a reuní pa un konsierto dilanti di e hotèl.
E informashon nobo aki a generá pregunta riba e òrdu di e susesonan i riba si un mihó komunikashon por a pone ku polis a rospondé mas rápidamente i neutralisá e atakante promé ku el a kometé e tiroteo mas mortal den historia moderno di Merka.
E trahadó, Stephen Schuck a bisa na NBC News ku e tabata revisando un porta di eskape pegá na piso 32 di Mandalay Bay na momentu ku el a skucha tiru i un bewaker a paresé ku un herida di bala na su pia.
Polis a bisa ku e atakante, Stephen Paddock, a kuminsá tira kontra un bewaker di e hotèl seis minüt promé ku el a inisiá e masakre kontra e konsierto dilanti di e hotèl.
Paddock a mata 58 persona i a heridá sentenar di hende mas.
E vershon aki ta kompletamente diferente na loke polis a duna siman pasa, indikando ku e atakante a tira kontra e bewaker desarmá despues di tira kontra e multitut.
Mandalay Bay ta duda den e historia nobo di echonan.
“Nos no ta sigur tokante e último historia aki”, asina Debra DeShong a bisa, kende ta bosero di MGM Resorts International. “Nos ta kere ku loke nan ta bisando no ta bèrdat”.
Polis di Las Vegas no a duna deklarashon na preguntanan hasi tokante komunikado di e hotèl.
