SHENZHEN, CHINA, AP.- E fundadó di Huawei a sigurá djamars ku e empresa teknológiko chines hamas lo divulgá sekreto di su klientenan òf su retnan komunikativo, purbando di trankilisá insinuashonnan ku e empresa ta spionando pa e gobièrnu komunista.
Esaki tabata e kontesta mas públiko i direktor di Ren Zhenfei kontra e akusashonnan, e fabrikante mas grandi di ekipo di telekomunikashon na mundu, kontrolá pa Partido Komunista.
Merka, Oustralia, Hapon i otro gobièrnunan a pone restrikshonnan na uso di su teknologia debí na e señalashonnan.
El a sigurá ku ni e ni su kompania a yega di haña un pedido di informashon konfidensial tokante un persona estranhero.
E imágen di e kompania ta sigui deteriorá na momentu ku un di su empleadonan chines a wòrdu arestá na Polonia, akusá ku spionahe. Huawei a anunsiá ku el a retirá e empleado i a sigurá ku su aktividatnan no tin nada di aber ku e empresa.
Ren ta tata di e direktor finansiero di Huawei, Meng Wanzhou, kende a wòrdu arestá na Canada riba 1e di desèmber konforme petishon di Merka. E ta wòrdu akusá di violá sanshonnan merikano kontra Iran.
Ren a ninga di duna komentario riba e kaso di Meng miéntras esaki ta tumando lugá den korte. Pero el a sigurá ku Huawei ta respetá lei di tur pais kaminda esaki ta operá, inkluyendo e restrikshonnan na eksportashon.
Dos kanades a wòrdu arestá pa outoridat chines. Nan ta wòrdu akusá di violá seguridat nashonal.
