BUENOS AIRES, ARGENTINA, AFP.- Hustisia a prohibí salida di 14 venezolano for di Argentina, ku ta forma parti di e tripulashon di un avion di karga ku bandera venezolano i ku ta inkluí sinku iraní tambe. Fuentenan hudisial a informá ku a kita nan pasport. Un hues federal di Lomaz de Zamora, Federico Villena a tuma e medida despues di un entrada hudisial di polis federal den kambernan di hotèl kaminda tripulantenan di e Boeing 747 ta keda, di ground desde 8 di yüni na aeropuerto internashonal di Ezeiza.
Den e operashon ku a kuminsá mardugá i prolongá durante shete ora a konfiská telefònnan selular, kòmpiuternan personal i dokumentashon di vários tipo, segun un fuente polisial.
E prohibishon di salida pa e venezolanonan ta suma un medida similar apliká desde djaluna riba e tripulantenan iraní pa “sospecho ku e motibu ku nan a proveé pa drenta Argentina no ta real òf bèrdat”.
E avion, ku a yega Argentina riba 6 di yüni prosedente di Mexico i ku a purba aterisá na Uruguay sin éksito, ta pertenesé na empresa Emtrasur, un filial di Coviasa kual ta venezolano i bou di sanshonnan di Finansa di Merka.
