NEW YORK, MERKA, AFP.- Un hues di New York a rechasá e petishon di prens Andrew pa kanselá e denunsia di agreshon seksual di un muhé merikano, ku ta akusá e prens di a abusá seksualmente di dje na aña 2001, tempu e tabatin 17 aña.
Den su desishon, hues Lewis Kaplan a bisa ku mester ninga di kanselá e demanda di e miembro real britániko den tur aspekto. E demanda sivil a wòrdu presentá pa Virginia Giuffre aña pasa, un di e víktimanan di delitonan seksual di e finansiero merikano Jeffrey Epstein.
Giuffre a bisa ku prens Andrew a atak’é seksualmente den kas di Epstein na New York i riba su isla priva di Virgin Islands na Merka, i tambe den kas di Ghislaine Maxwell, kende tabata pareha sentimental di Epstein, i tambe kondena pa trafikashon di menornan resientemente.
Giuffre a bisa ku Epstein tabata fòrs’e pa tene relashon seksual ku su amigunan riku i poderoso, inkluyendo Andrew. E prens a ninga e akusashonnan aki enérgikamente.
