LONDON, AP.- Un Iceberg, shete biaha e tamaño di siudat di New York, a los di plataforma Larsen C, un plataforma krusial di eis flotante den Antártika. Asina ekspertonan di Universidat britániko Swansea a bisa djárason.
E iceberg, ku probablemente lo risibí e nòmber A68, ta pisa 1 bion tonelada métriko.
E proseso a tuma lugá den último dianan den un sektor di 6.000 kilometer kuadrat práktikamente dòbel di Luksemburg.
“Nos a antisipá e evento aki desde vários luna, i nos a keda sorprendé ku el a tuma asina hopi tempu”, segun señalashon di Adrian Luckman, di Universidat di Swansea. “Nos lo sigui vigilá e impakto di e separashon riba plataforma Larsen C.
Ta trata di un suseso natural ku no a wòrdu provoká pa kambio di klima kousa pa sernan humano, segun glasiologo di Swansea Martin O’Leary.
Sientífikonan a bisa ku e separashon no ta afektá nivelnan di laman riba término kòrtiku.
