NW DELHI, INDIA, AFP.- India a outorisá uso di dos vakuna di Coronavirus desaroyá pa AstraZeneca i Universidat di Oxford i tambe pa un empresa lokal Bharat Biotech.
A aprobá e vakunanan pa uso di emergensia, segun e kontroladó general di medisina na India.
Promé minister Narendra Modi a tweet ku e aprobashonnan ta aselerá e ruta pa un nashon mas sano i liber di COVID.
India ta e di dos pais mas afektá ku mas di 10,3 mion kaso i kasi 150.000 morto, maske e kantidat di infekshonnan a baha for di sèptèmber kaminda tabata registrá mas di 90.000 kaso diario di COVID-19.
India kier vakuna 300 mion di su poblashon di 1.3 bion pa mitar di 2021.
Ambos vakuna ta keda atministrá den dos dósis. E “Serum Institute” di India, un di fabrikantenan di mas grandi di vakuna a bisa ku ta produsiendo entre 50 i 60 mion dósis di e vakuna di AstraZeneca/Oxford pa luna.
