AHMEDABAD, INDIA, AP.- India ta konstruyendo un muraya alrededor di un bario pober den estado di Gujarat i segun bisiñanan ta pa e presidente merikano no mira esaki durante su próksimo bishita.
E barera, ku un ekstenshon di mitar kilometer lo wòrdu konstruí alrededor di e bario Ahmedabad, den estado di Gujarat, kaminda Trump lo bishita promé ku fin di luna. E bario tin 2.000 habitante.
Segun prensa lokal, e muraya su altura inisial tabata entre 1,8 i 2,1 meter haltu. Pero esaki a wòrdu redusí na 1,2 meter despues ku e notisia a yega na medionan di komunikashon.
Aparte di esaki, outoridat a duna òrdu pa ekspulsá 45 famia pa un otro bario. E bisiñanan a bisa ku esaki ta debí na e bishita di Trump kual e konseho munisipal ta ninga.
Un funshonario di gobièrnu a deklará ku e tereno ta propiedat di gobièrnu i ku e ekspulshonnan aki ta sosodé konforme lei. E no a duna motibu dikon esaki ta sosodé nèt promé ku yegada di presidente merikano Donald Trump.
