MUMBAI, INDIA, AP.- Rekordando e désimo aniversario di e atakenan ku a mata 166 persona, Merka a ofresé un rekompensa nobo pa esun ku brinda informashon tokante e asedio di 2008.
E milisianonan pakistani outor di e atake a wòrdu matá òf kapturá.
Pero e sekretario di Estado merikano Mike Pompeo a bisa djaluna ku e outornan intelektual di e atake no a wòrdu kondená. El a pidi Pakistan pa sanshoná esnan responsabel i a bisa ku Merka ta ofresé 5 mion dòler komo parti di su kompromiso pa huzga tur e outornan di e atake.
26 di novèmber 2008, milisianonan a efektuá atakenan koordiná den kurason di e kapital finansiero di India. E blankonan tabata dos hotèl di luho, un sentro hudiu, un restorant turístiko i un stashon di riel. E matansa a dura tres dia.
India a atribuí e milisia pakistani Lashkar-e-Taiba pa e atake, kual a provoká un krísis den e relashon entre e dos bisiñanan ku arma nuklear. Funshonarionan indio a akusá inteligensia pakistani komo e outor intelektual. Islamabad a rechasá esaki.
E promé minister indio Narendra Modi a ekspresá su “solidaridat ku e famianan afektá. Un nashon agradesido ta rendi homenahe na su polisnan i forsa di seguridat ku a kombatí e teroristanan durante e atakenan di Mumbai”.
E úniko milisiano sobrebibiente di e atakenan a wòrdu ehekutá na palu di horka den novèmber 2012. India a hasi vários petishon na Pakistan pa e pais investigá e kaso di forma mas aktivo i tuma medidanan kontra esnan ku ta wòrdu konsiderá komo responsabel pa e atake.
