DETROIT, AP.- Un ingeniero di VW a deklará kulpabel pa kargonan di konspirashon den e skandal di emishon di e kompania i a aseptá di deklará kontra otronan. Esaki ta permití un avanse den e investigashon.
James Robert Liang, di 62 aña, a deklará kulpabel den korte federal na Detroit pa un kargo di konspirashon pa defroudá e gobièrnu pa medio di froude.
Liang ta e promé persona pa presentá un alegashon den e kaso i su koperashon ta un avanse importante den e peskisa di departamento di Hustisia na Merka. Dokumentonan di fiskal ta indiká ku otro personanan tabata involukrá i ta mustra riba diferente mensahe elektróniko ku probablemente a bini di empleadonan di VW na Wolfburg, Alemania.
Volkswagen a atmití ku e kompania a instalá kòntròl di emishon den 500.000 motor diesel di dos liter di e modèlnan di VW i Audi. Durante prueba di emishon tabata aktivá e sistema i den kondishon normal tabata paga esaki. E Agensia di Protekshon Ambietal (EPA) a determiná ku e outonan tabata saka 40 biaha riba e límite legal di oksígeno di nitrógeno, ku ta kousa problema ku halamentu di rosea.
