WASHINGTON, AP.- E kantidat di inmigrantenan mehikano ku ta biba sin outorisashon na Merka a baha pa promé biaha durante e último dékada aki, segun kalkulashon di Sentro di Investigashon Pew, publiká djárason.
Pero e kantidat di sentroamerikanonan ku ta ilegalmente den e pais a oumentá: di 1,5 mion na 2007 pa 1,9 mion na 2017, segun e estudio.
E pelea kontra inmigrashon a bira e standart polítiko pa presidente Donald Trump, pero su postura estrikto i medidanan kaótiko na frontera no a logra baha e fluho i e kantidat ta oumentando for di na momentu ku el a asumí su puesto komo mandatario di e pais.
Na aña 2017, tabatin 4,9 mion mehikano bibando ilegalmente na Merka, 2 mion ménos ku aña 2007. E grupo di investigashon a señalá ku e punto mas haltu a wòrdu registrá na aña 2007, ku mas o ménos 12,2 mion. E mehikanonan tabata forma mas di mitar di e sektor aki di e pueblo. Pero awor esaki ta un kombinashon, i e sentroamerikanonan ta representá e di dos kantidat mas grandi di migrante, siguí pa asiátikonan ku 1,4 mion.
