BAGHDAD, AP.- Irak a ehekutá 36 hòmber kondená pa partisipá den un masakre di sentenar di sòldat bou di mando di Estado Islámiko na 2014. Asina funshonarionan di gobièrnu a informá.
E hèmbernan a wòrdu horka den e prison di Nasiriyah na sùit di Irak, segun indikashon di e gobernador provinsial Yahya al-Nasiri. Un funshonario di ministerio di Hustiaia, ku a papia bou di kondishon pa no wòrdu identifiká paso e no ta outorisá pa informá prensa, a konfirmá e notisia. Estado islámiko a kapturá 1.700 sòldat despues di a tuma kòntròl di Tikrit, e pueblo natal di Saddam Hussein na 2014. E sòldatnan a purba hui pa Camp Speicher, un base militar merikano nèt pafó di e siudat. Algu despues di kapturá Tikrit, EI a publiká imágen di e hòmbernan ku a mata e sòldatnan.
E masakre di Speicher a provoká indignashon den e pais i a duna impulso na e mobilisashon di milisianan shiita kontra Estado Islámiko, ku ta un grupo ekstremista suni. E poder di milisianan ta similar ku esun di forsanan armá konvenshonal. Forsanan irakí rekuperá Tikrit na 2015 ku yudansa di Merka a detené masha hopi hòmber. Esnan ehekutá djadumingu a keda kondená na morto pa un tribunal vários luna pasa. E titular di konseho di provinsia di Sallahuddin, kual su kapital ta Tikrit, a krítika e proseso hudisial i a bisa ku algun di esnan ehekutá a konfesá bou di tortura.
