ISTANBUL, AP.- Un menor di edat a aktivá un bòm i a mata por lo ménos 51 persona, ademas di kousa heridanan na 69 persona mas. Esaki a tuma lugá na un kasamentu kurdo serka di frontera Turko i Siria. Asina presidente Recep Tayyip Erdogan a informá djadumingu. E mandatario a deskribí e atentado komo un posibel intento di ekstremistanan di Estado islámiko pa destabilisá e nashon probechando di tenshonnan ètniko i religioso.
“ For di awor, e konklushonnan di e ofisina di nos gobernador i polis ta indiká un atake di Daesh”, asina Erdogan a bisa, kende a usa e nòmber árabe di e grupo di Estado Islámiko (EI).
E atake di djasabra na Giazantep tabata esun mas mortal na Turkia pa e aña aki. E eksploshon a tuma lugá na momentu ku e pais ta pasando den e konsekuensia di e golpe di Estado ku a frakasá na luna pasa. E gobièrnu a kulpa e intento di golpe na e klérigo musulman Fethullah Gulen ku ta biba na Merka. For di Istanbul, Erdigan a afirmá ku e atakante tabatin entre 12 i 14 aña. El a señalá ku 69 persona a resultá heridá i 17 ta den estado kritiko.
Un shofùr di bus ku a trasladá algun invitado di Siirt pa Giazantep a bisa ku e no por a keda 
ku e atentado tabata dirigí kontra e fiesta. Esaki tabata un kasamentu. Un kasamentu ordinario. “E atake aki tabata deplorabel. Kon nan por pensa pa hasi algu asina”.
