TEHRAN, IRAN, AFP.- Iran a bisa ku e proyekto di Merka pa reforsá koperashon riba defensa aéreo entre su aliadonan di Medio Oriente ta “provokador”, un tema ku presidente merikano Joe Biden lo trata durante su próksimo bishita den e region otro siman.
E proyekto “ta un proposishon provokador i un menasa pa seguridat nashonal i regional”, segun indikashon di e bosero di Eksterior iraní, Nasser Kanani.
Durante su bishita na Saudi Arabia, Biden lo menshoná “e kolaborashon regional pa reforsá defensa aéreo” entre oro, segun indikashon di e bosero di Konseho di Seguridat Nashonal di Kas Blanku, John Kirby.
E mandatario merikano lo bishita otro paisnan den region, inkluyendo Israel, enemigu di Iran, i mester reuní ku dirigentenan di Egipto, Irak i Hordania. Aparte di esaki e lo partisipá den un kumbre di Konseho di Koperashon di Golfo (GCC), kual ta un reunion di monarkianan árabe di Golfo.
Merka i su aliadonan den Medio Oriente ta akusá Iran ku destabilisashon den e region ku su programa di misil i sosten na gruponan arma.
